విష్ణువే మహాలక్ష్మి

    సర్వాంతర్యామి  ఐన  శ్రీ మహా విష్ణువునకు , శ్రీ మహా లక్ష్మీకిని  వ్యత్యాసమే లేదు. 
ఇద్దరికి  ఒకే  వైభవము, ఒకే  బలము  వున్నది, అని  అన్నమయ్య  చాలా తియ్యని మాటలతో , తన సంకీర్తనలో చెప్తున్నారు.  కలకాలము  ప్రతిదినమూ  మహా వైభవంతో  మనసే  విష్ణువు , లక్ష్మి వేరువేరుగాదు, సకల సృష్టీ , సర్వమూ  ఆ  వైష్ణవమే నని , వొక్కాణించారు ఇలా......... 

                 రామనామమతనిది   రామవు  నీవైతేనూ 
                   చామన వర్ణమతడూ , చామనయవు నీవు 
                      వామనుడు  అందురతని , వామనయవు నీవూ 
                        ప్రేమపు ఇద్దరికి  “ పేరు  బలము  ఒకటే “

“రమా , రామ”  అంటే , “లక్ష్మియు విష్ణువు “ అని అర్ధము. 
వామనావతారం  విష్ణువే, ఆ విష్ణువు ,ఎడమ వైపున్నది లక్ష్మీ దేవియే .. 
వారిద్దరికి  ఒకరిపై యింకొకరికి  ఎంతో  ప్రేమవుంది. ఇద్దరి కున్న తేజస్సు, ఓజస్సులు  సమానమే , 
అని అన్నమయ్య చెప్తున్నారు. 

                            జలజనాభుడతడు , జలజముఖివి నీవు 
                               అలమేలు మంగవు నీవు, అలమే తాను    
                                  ఇలలో శ్రీ వేంకటేశుడు , ఇటునిన్నురానామోచే 
                                     పిలిచి పేరు చెప్పే , పేరు బలము ఒకటే. ( 280, సంపుటం 7)

  విష్ణువు పద్మనాభుడట.  మరి లక్ష్మీ దేవి  పద్మమువలె అందమైన ముఖముగలదట.  
ఈ భూమిపై, వారిద్దరూ  శ్రీ వేంకటేశుడు , అలమేలుమంగగా కొలువై వున్నారు. 
అలమేలు మంగకు, శ్రీ వెంకటేశునికి  వున్న ఓజస్సు  తేజస్సులు ,  ఒకే విధమైనవి, సమానమైనవి, అని అన్నమయ్య చెప్తున్నారు. 

ఇక్కడ గూఢార్థమేమిటంటే,  విష్ణువునకు  లక్ష్మికి  భేదం లేదు. ఇద్దరూ ఒకటే . ఇద్దరికున్న  బలము  సమానమంటే , ఇద్దరూ ఒకటేనని అర్ధము. 

విష్ణువే  వైష్ణవి.  హరియే హరిణి.  పద్మనాభుడే  పద్మావతి. 

  శ్రీ మహా విష్ణు వైభవమే శ్రీ మహా లక్ష్మి.   

                           అన్నమయ్య మాట